From:- Sikandar Khan

Dukh Dard K Maron Se Mera Zikar Mat Karna,
Ghar Jao To Yaron Se Mera Zikar Mat Karna..!

Wo Zabt Na Kar Paayein Gy Aankhon K Samandar,
Tum Raah-Guzaron Se Mera Zikar Mat Karna..!

Phoolon K Nasheman Mein Raha Hoon Main Sada Se,
Dekho Kabhi Kharon Se Mera Zikar Mat Karna..!

Shayed Yeh Andhery He Mujhe Raah Dikhayein,
Ab Chand Sitaron Se Mera Zikar Mat Karna..!

Wo Meri Kahani Ko Ghalat Rang Na De Dein,
Afsana Nigaron Se Mera Zikar Mat Karna..!

Shayed Wo Mere Haal Pe Be-Sakhta Ro Dein,
Es Baar Baharon Se Mera Zikar Mat Karna..!

Le Jayein Gy Gehrai Mein Tum Ko Bhi Bahaa Kar,
Darya K Kinaron Se Mera Zikar Mat Karna..!

Wo Shakhs Mily To Usy Har Baat Batana,
Tum Sirf Ishaaron Se Mera Zikar Mat Karna !